Умилено бо видѣти и жалостно зрѣти таковых русскых събраниа и учрежениа ихъ, вси бо равнодушьни, единъ за единого, другъ за друга хощеть умрети, и вси единогласно глаголюще: «Боже, с высоты призри на ны и даруй православному князю нашему, яко Констяньтину побѣду, покори под нозѣ его врагы Амалика, якоже иногда кроткому Давиду». Сему же удивишася литовьскии князи, рекуще в себѣ: «Нѣсть было преже нас, ни при насъ, ни по насъ будеть таково въинство уряжено. Подобно есть Александра царя макидоньскаго въиньству, мужеством бысть Гедеоновы снузници, Господь бо своею силою въоружилъ их!»
Князь же великий, видѣвъ плъци свои достойно уряжены, и сшед с коня своего и паде на колѣни свои прямо великому плъку чернаго знамениа, на немъ же въображенъ образ Владыкы Господа нашего Исуса Христа, из глубины душа нача звати велегласно: «О Владыко Вседръжителю! Виждь смотреливым оком на люди сия, иже твоею десницею сътворени суть и твоею кровию искуплени работы вражиа. Внуши, Господи, гласъ молитвъ нашихъ, обрати лице свое на нечестивых, иже творять злаа рабом твоим. И нынѣ, Господи Исусе Христе, молю и покланяюся образу твоему святому и пречистѣй твоей Матери и всѣм святым, угодившим тебѣ, и твръдому и необоримому заступьнику нашему и молебнику иже о насъ, к тебѣ, русскому святителю, новому чюдотворцу Петру, на его же милость надѣемся, дръзаем призывати и славити святое и великолѣпое имя твое, Отца и Сына и святого Духа, нынѣ и присно и въ вѣкы вѣкомъ! Аминь».
Скончавъ молитву и всѣд на конь свой и нача по плъком ѣздити съ князи и въеводами. Коемуждо полку рече: «Братиа моа милаа, сынове русскыа, от мала и до велика! Уже, братие, нощь приспѣ, и день грозный приближися — в сию нощь бдите и молитеся, мужайтеся и крѣпитеся, Господь с нами, силенъ въ бранех. Здѣ пребудите, братие, на мѣстех своих, немятущеся. Койждо вас нынѣ учредитеся, утрѣ бо неудобь мощно тако учредитися: уже бо гости наши приближаются, стоять на рецѣ Непрядвѣ, у поля Куликова оплъчишася, утрѣ бо нам с ними пити общую чашу, межу събою поведеную, еяже, друзи мои, еще на Руси въжделѣша. Нынѣ, братьа, уповайте на Бога жыва, миръ вам буди о Христѣ. Аще утрѣ ускорять на нас приити погании сыроядьци».
Уже бо нощь приспѣ свѣтоноснаго праздника Рождества святыа Богородица. Осѣни же тогда удолжившися и деньми свѣтлыми еще сиающи, бысть же въ ту нощъ теплота велика и тихо велми, и мраци роснии явишася. Поистинѣ бо рече пророкъ: «Нощь не свѣтла невѣрным, а вѣрным просвѣщена».